Stad van God
Calvyn en die stad Genève het byna sinonieme met mekaar geword. Dit is daar waar Calvyn hom besig gehou het met 'n poging om 'n sigbaarder "Stad van God" in Europa te bou. In die proses was dit die plek waar Calvyn van sy belangrikste teologiese bydraes tot die Reformasie gemaak het, maar ook waar hy van sy donkerste oomblikke beleef het.
Nadat Calvyn in 1538 uit Genève moes vlug as gevolg van sy stryd met die Libertyne, het hy in 1540 'n dringende versoek van die stadsvaders ontvang om terug te keer. Teen sy eie wil, maar oortuig van die feit dat dit God is wat hom terugroep, het Calvyn op 4 September 1541 in Genève aangekom.
Die eerste saak waaraan Calvyn aandag gegee het, was 'n kerkorde. Die kerkorde wat Calvyn opgestel het, Ordonnances Ecclesiastiques, is op 20 November 1541 in die gemeente voorgelees en deur die kerkraad, die gemeente en die burgerlike owerheid aanvaar.
Die basiese vertrekpunt van Calvyn se kerkorde was die soewereiniteit van die kerk in geestelike sake.
Calvyn het vier ampte ge-identifiseer: ouderlinge, diakens, predikante en doktore. Elke gemeente moes 'n kerkraad hê wat verantwoordelik was om die gemeente volgens Bybelse riglyne te regeer en tug toe te pas.
Die kerkorde het dit ook duidelik gestel dat die burgerlike owerheid alles in sy vermoë moes doen om die kerk te ondersteun om haar roeping in die wêreld na te kom. In 1542 het die stadsraad van Genève die wette van die stad so verander dat dit in ooreenstemming was met Calvyn se kerkorde.
Alles was egter nie maanskyn en rose nie. Die jare 1543 tot 1553 was 'n tydperk van geweldige stryd in Genève. Een van die hoofrolspelers was die Spanjaard Michael Servetus.
Servetus het reeds in 1545 met Calvyn kontak gemaak en het gou bekend geword vir sy kritiek teen Calvyn se teologie. Nadat Calvyn 'n kopie van sy Institusie aan Servetus gestuur het, het Servetus dit, met kritiek in die kantlyne geskryf, teruggestuur.
Dit het Calvyn woedend aan Farel laat skryf dat as Servetus dit ooit sou waag om Genève te besoek, "hy hom nie sou toelaat om lewendig te vertrek nie." Hierdie woorde van Calvyn was nie 'n ydele dreigement nie. Nadat Servetus sy boek Christianismi Restitutio - Die herstel van die Christendom in 1553 gepubliseer het, het hy op pad na Italië in Genève aangedoen. Hy is gearresteer, is as ketter verhoor en het op 27 Oktober 1553 op die brandstapel gesterf.
Geskryf deur Prof Johan van der Merwe (Kerkgeskiedenis-professor aan die Universiteit van Pretoria vir e-Kerkbode).
- Besonderhede
Gemeente Boodskappe
Ons dank U Here vir die voorreg om ons kind te kon sien trou en om U genade al hoe meer te waardeer!
Ek is so dankbaar dat U my gehoor het in my benoudheid van die motorongeluk. U het my 'n tweede kans gegee. Joey
Dankie dat U ons seun sterk gemaak het om sonder ongewensde goed in sy lewe te kan leef.
Na drie jaar se wag het U ons kom verras met 'n wonderwerk uit U hand toe ons dit die minste verwag.
Dankie vir groot genade, liefde en onverdiende guns so mildelik ontvang dag na dag.
Dankie vir 'n nuwe gesonde kleinkind.
Dankie dat U my beskerm en omvou het gedurende my nagmerrie van "smash & grab". Vir al U liefde en dat U altyd daar is vir my. Ek loof U!!! Susan
Ek loof U waar U by my was met 'n noodoperasie vir retina-loslating. Elaine
Ek loof U vir die verlossing van my vrou se lyding. Die rykdom van U genade is groot!
Dankie dat U vir my kinders en kleinkinders voorsien het in hul nood vir werk, huisvesting en ander seëninge. Ons eer U!
Dankie vir nuwe werk!
Ek loof U vir oorplasing na Pretoria!
Here, ek loof U vir vertroosting, genade en geloofsgroei. U daaglikse bystand en sekerheid in hierdie deurmekaar wêreld. Dankie my Verlosser!
Here ek loof U vir genesing van my wederhelf!
2015/16 was hard. Vierkeer in hospitaal en drie operasies. Nou heeltemal gesond! Dankie Here! Lettie
Ek loof U vir die deure wat U toe en oopgemaak het voor U my dierbare man kom haal het. Vir vertroosting, moed .. en pad wat U gelyk maak ... Ook vir broers en susters in die geloof.
Here ek loof U want U het my vrou deur twee hartaanvalle ene bloedklont in long bewaar! Ook my dogter met brongitis. Dankie!
HERE ek loof U dat U altyd in beheer is van ons lewe! Niks kan ons van U liefde skei nie. Philip & Shirley
Dankie vir U liefde en U kosbare Woord!
Ek dank U vir elke genadegawe deur die jaar!
Dankie Heer vir goeie gesondheid en die liefde van al my kinders en familie.
Ek dank U vir al die "klein" dinge wat ons nie altyd "raaksien" nie bv. plante, reën, voëls, diere ens.
Ek loof U dat U my elke dag staande hou in my omstandighede!
Loof U vir die krag wat U elke dag aan ons gee!
Dankie vir reën en gesondheid! Alleen
Dankie getroue Here dat U al ons krankhede op U neem en dat U by ons bly tot in die ouderdom!
Dankie Here dat U ons gehelp het onder ons finansiële druk en ons staande gehou het.
Dankie vir gesondheid, pragtige kinders en kleinkinders asook goeie mense op my pad.
Here ek loof U vir U goedheid, 'n wonderlike seun en ma. Dankie dat U altyd voorsien en vergewe.
Here ons loof U vir goeie gesondheid, krag van Bo en genade. Wat ek ontvang het kom alles van U.
Ek loof U vir die genade elke dag. Vir beterskap in my gesondheid sodat ek kan aangaan in die lewe. Baie dankie Here!
Hierdie gemeente eer U as die Hoof en Here van U kerk! As gemeente gee ons U die eer vir U troue sorg oor baie jare heen. Ons dank U vir leraars, personeel, leiers en lidmate wat met hul gawes U gemeente dien. Ons is ook dankbaar vir elke omgeegroep waar mense omgee-liefde teenoor mekaar uitleef. Dankie vir die verskil wat U deur hierdie gemeente in die gemeenskap maak. Aan U alleen bring ons dank!
- Besonderhede
Calvyn se lewe verander
Op ons reis terug na die Reformasie, ontmoet ons vir Calvyn op 23 Augustus 1534 in Parys. Hy stap saam met mede-Katolieke in 'n optog waarin daar vir die slagoffers van die Swart Dood gebid word.
Sy lewe sou egter binne maande 'n totale omwenteling ondergaan. Na 'n lesing van sy vriend, Nicolaas Cop, rektor van die Universiteit van Parys, oor die Saligsprekinge, moes Calvyn ook vir sy lewe vlug. Die geleerde van Parys het binne dae 'n protestantse vlugteling-sendeling geword wat die evangelie in kelders en grotte verkondig het.
Calvyn vlug na Basel, maar op pad daarheen dwing 'n militêre padblokkade hom om met 'n ompad deur Geneve te reis. Dit is daar, waar Farel, hoof van die kerk in Geneve, by Calvyn pleit om aan te bly en te help met die uitbou van die gemeente.
Die eerste vyf maande het Calvyn, sonder inkomste, geen indruk op die gemeente gemaak nie. Sy deurbraak het egter gekom tydens 'n teologiese debat waar hy groot indruk gemaak het met sy teologiese kennis. Kort daarna is hy aangestel as een van die leraars van die gemeente met die opdrag om 'n geloofsbelydenis en 'n kerkorde vir die gemeenskap op te stel.
Sy kerkorde is in Januarie 1537 deur die stadsbestuur aanvaar, maar is onmiddellik met groot weerstand deur die inwoners begroet. Dit was veral die artikel wat bepaal het dat al die lidmate in die openbaar belydenis van hulle geloof moes doen, wat groot reaksie ontlok het. Daar was ook hewige reaksie teen 'n dissiplinêre proses vir morele oortredings. Weerstand teen Calvyn en Farel het so toegeneem dat hulle verban is.
Hierdie gebeure lei Calvyn na Strassburg, waar hy op uitnodiging van Martin Bucer in 1538 met 'n bediening onder Franse vlugtelinge soos hyself begin het. Oorlewering wil dit hê dat Calvyn drie gelukkige jare in Strassburg deurgebring het. Die gemeente het hom heelhartig aanvaar, hy kon verder studeer, het aan teologiese debatte deelgeneem en het bevriend geraak met die Duitse hervormer, Melanchton.
In 1540 is Calvyn getroud met Idelette de Bure, die weduwee van Jan Stordeur, wat hom tot met haar dood in 1549 versorg het. Calvyn was nie gesond nie, en het onder andere gely aan kroniese hoofpyn, long- en maagprobleme, jig, artritis en slaaploosheid. Volgens Beza was dit slegs te danke aan Idelette se versorging dat Calvyn met sy bediening kon voortgaan.
Geskryf deur Prof Johan van der Merwe (Kerkgeskiedenis-professor aan die Universiteit van Pretoria vir e-Kerkbode).
- Besonderhede