Watter paadjie volg jy?
Tydens 'n onlangse vakansie in Europa, het ek die meegaande foto geneem op 'n wandelroete teen die hange van die Alpe naby Innsbruck, Oostenryk.
Dit het my laat dink aan die smal weg en die breë weg. As jy jou geheue wil verfris lees weer Mattheus 7: 13 - 14.
Soos gesien kan word op die foto is die breë paadjie (regs) die een wat die maklikste lyk om te volg, meer verlig en meer gelyk. Lekker! en nog afdraend daarby ook!
Die smaller paadjie (links) lyk na 'n moeiliker, donkerder en onseker roete om te volg.
Dit was net na 8 uur die aand (ja, dis dan nog lig daar in hul somer), en ek en my vrou het besluit om maar eerder uit die onvreemde te bly en die maklike paadjie te volg. Dit het ook gelyk of die smal paadjie nog ekstra opdraendes het!
Is ons almal se lewens nie ook maar soos die twee paadjies op die foto nie? Elke dag moet ons kies tussen 'n smal, moeilike paadjie of 'n breë maklike paadjie. Op watter paadjie was jy vandag?
- Besonderhede
![Die Sombrero Sterrestelsel](/images/articles/algemeen/ngrs-algemeen-sombrero.jpg)
Die Sombrero Sterrestelsel
Die Sombrero is 'n spiraal vormige sterrestelsel aan die suidelike rand van die Virgo groep van sterrestelsels, een van die grootste hemelliggame in die Virgo groep.
Die Sombrero sterrestelsel is 28 miljoen ligjare vanaf die aarde, 50 000 ligjare in deursnee en gelykstaande aan 800 biljoen sonne.
Dit is ontdek in 1767 deur Pierre Méchain.
'n Ligjaar is 'n eenheid van lengte, gelyk aan net minder as 10 triljoen kilometer, wat gebruik word om afstande op 'n galaktiese skaal te meet.
Dit plaas die Sombrero sterrestelsel 28 miljoen ligjare x 10 triljoen kilometer per ligjaar vanaf die aarde, en 50 000 ligjare x 10 triljoen kilometer per ligjaar in deursnee.
Ek het nie die sommetjies gemaak nie, my sakrekenaar wou nie ...
Die feit is, die ding bestaan, en hy is dáár, en hy is groot! en deksels vêr!
Die hele gedoente is bo my vuurmaakplek. Ek kry nie my brein sover om die omvang van hierdie afstande te verstaan en te visualiseer nie. En die Sombrero is nie die enigste een nie, daar's 'n magdom soortgelyke sterrestelsels!
In hierdie ontsagtelikheid van ons heelal, is ons nie eers 'n spikkeltjie nie, ... en tog is ons hier ... Christen en nie-Christen. Wat sê dit nie van God se grootheid nie?
deur
Casper Erasmus
Krediet: NASA en Hubble Heritage Team
- Besonderhede
Woorde maak baie dieper seer as fisiese mishandeling
Wanneer fisiese mishandeling stop, bly die pyn en vernedering deur woorde steeds daar. Die volgende frases gebruik jy dalk self gereeld, of jy hoor ander mense dit gebruik.
- Jy sal nooit verander nie,
- Jy is altyd teen my,
- Ek weet jy sal my verstoot - dis net 'n kwessie van tyd,
- Jy kan nooit vertrou word nie,
- Jy is 'n mislukking,
- Jy is hopeloos,
- Dit is geheel en al jou skuld as hierdie verhouding misluk.
Maak tyd om hieroor na te dink en vra dat God jou sal help om heeltemal eerlik voor Hom te wees. Bely die dinge waaraan jy skuldig is. Vra die Here om jou te help om ander te vergewe wat hierdie woorde teenoor jou gebruik het.
- Besonderhede